Zbulohet fotoja e Klodian Banes, i cili sipas policisë është i dyshuari kryesor për vrasjen e Jurgen Kurtit. Ai dyshohet se ishte personi që e ekzekutoi menaxherin e VIP-ave, poshtë hyrjes së pallatit mbrëmjen e 18 marsit. Bane është në kërkim nga policia, ndërsa emri i tij u zbulua nga njëri prej tre personave që u arrestuan si bashkëpunëtorë.
22-vjeçari Olsi Qalliaj, lindur në Fier dhe banues në Patos, ishte personi që përmendi për herë të parë emrin e Klodian Banes, dhe që e ka orientuar policinë drejt dyshimeve të forta se është ai personi që ekzekutoi Jurgen Kurtin. 4 ditë para ekzekutimit të Jurgen Kurtit, Qalliaj e takoi Klodian Banen dhe i mori çelësin për të fjetur në apartamentin e tij.
Burime nga grupi hetimor thanë se mund të kemi të bëjmë me vrasës me pagesë, ndërkohë që porositësi ende nuk është zbuluar. Dyshimet janë që të rinjtë të jenë paguar 30 mijë euro për të bashkëpunuar në eliminimin e 26-vjeçarit. Të arrestuar deri tani për bashkëpunim janë; Elsi Levendi, Alesio Berberi dhe Olsi Qalliaj.
Asnjë prej tyre nuk ka pranuar përfshirjen në ekzekutimin e Jurgne Kurtit, biznesmen, dhe menaxher i VIP-ave, por janë hetimet e Policisë të cilat deri më tani i akuzojnë ata si persona që kanë ndihmuar ekzekutorin në realizimin e krimit. Ata dyshohet ta kenë ndihmuar me makinë, me gjetjen e armës, dhe me ndjekjen e Jurgen Kurtit prej dy javësh për të mësuar lëvizjet e tij.
