Në takimin e mbajtur sot në sheshin “Nënë Tereza”, Kryetari I Bashkisë së Tiranës ka publikuar mesazhet e marra nga demokratët përmes celularit, të cilët kanë lënë pas dallimet politike dhe i janë bashkuar sot në shesh qytetarëve të shumtë.
“Një falenderim për miqtë tanë demokratë. Keni bërë zgjedhjen e duhur. I kam marrë mesazhet tuaja. E ndjej zhgënjimin tuaj me një parti që nuk ju përfaqëson më, e ndjej zhgënjimin tuaj me bashki që mbyllen. Për të gjithë miqtë demokratë që e kanë parë që nën qeverisjen e Edi Ramës dhe PS, shteti bëhet më i mirë, ekonomia më e ndershme,drejtësia më e fortë, mirë se erdhët në familjen tonë, faleminderit që na u bashkuat”, tha Veliaj.
Kryebashkiaku Veliaj foli edhe për projektet e reja që do ndërmarrë Bashkia e Tiranës, nën drejtimin e tij, të cilat do të finalizohen pavarësisht se disa njerëz përpiqen të përdhosin qytetin.
“Do fitojmë në Astir dhe do të kemi një unazë moderne. Do të kemi një kopsht zoologjik kombëtar. Do kemi një teatër të ri kombëtar që zëvëndëson një karakatinë 100-vjeçare. Epoka e gurit nuk mbaroi se mbaruan gurët. Shumë vijnë të armatosur me gurë në Tiranë. Ne i themi jo bullzimit dhe atyre që përdhosin Tiranën“, u shpreh Veliaj.
