Ministrja e Shtetit për Marrëdhënie me Parlamentin, Elisa Spiropali, ka reaguar ashpër ndaj paralajmërimit të Presidentit Ilir Meta se do të nëshkruajë një dekret që do të jetë, siç ka thënë ai, “shpartallim i plotë i grushtit të shtetit” dhe ndaj thirrjes që Meta u bëri qytetarëve shqiptarë që më 2 mars të mblidhen në bulevardin “Dëshmorët e Kombit” për “një besëlidhje për të shpartalluar regjimin e oligarkëve”.
“Presidentit i ka dalë gjuha jashtë kontrollit dhe s’ka më asnjë kontroll mbi Ilir Metën”, shkruan Spiropali, në një postim në Twitter.
Ajo ka thënë se “grushti i shtetit” është reagim i Metës ndaj Reformës në Drejtësi.
“Sa për grushtin e shtetit, ai ka nisur në kokën e Ilirit qysh kur nisi Reforma në Drejtësi dhe do të vazhdojë sa herë që në konsensus me SHBA/BE ne miratojmë ligje që atij i duken grushta”, .
“Zoti e ndihmoftë Ilir Metën”, thekson Spiropali.
Elisa Spiropali është një ndër mbështetëset më të fuqishme të kryeministrit Edi Rama.
Postimi i plotë i Spiropalit:
1/ Pyetja sot s’është pse Presidentit i ka dalë gjuha jashtë kontrollit dhe s’ka më asnjë kontroll mbi Ilir Metën. Kjo dihet. Pyetja është pse Ilir Meta priti Konferencën e Donatorëve për ta ribërë leckë Presidentin! Keqardhja për Presidentin ka sosur. Ajo për I.Metën s’ka të sosur!
2/ Zoti e ndihmoftë Ilir Metën se Presidentin s’e ndihmon dot më as Luli!
Populli jo e jo. Sa për grushtin e shtetit, ai ka nisur në kokën e Ilirit qysh kur nisi Reforma në Drejtësi dhe do të vazhdojë sa herë që në konsensus me SHBA/BE ne miratojmë ligje që atij i duken grushta.
