Guvernatori i Bankës së Shqipërisë Gent Sejko u shpreh se, kursi i këmbimit këtë vit është shfaqur më i stabilizuar krahasuar me vitin e kaluar.
Sejko tha për mediet se, “kemi pasur një mbiçmim të kursit të këmbimit, kryesisht gjatë sezonit të verës nga efekti sezonal, turizmi, por mbiçmimi i kursit të këmbimit ka qenë më i lehtë sesa ai i vitit të kaluar dhe sektorë të ndryshëm të ekonomisë kanë qenë më të përgatitur për të përballuar rrezikun e mbiçmimit të kursit të këmbimit”.
Sipas tij, ne jemi një ekonomi me deficit tregtar që do të thotë se kemi më shumë importe sesa eksporte. Sektori që është më i prekshëm dhe më i ndjeshëm ndaj mbiçmimit të kursit të këmbimit është eksporti, sepse eksportuesit eksportojnë në euro, por përdorin lekun për lëndët e para, pagesat dhe shpenzimet e tjera që ata kanë nevojë. Ndërkohë që në të kundërt është sektori importues.
“Kursi i këmbimit, në nivel ekonomie si e tërë nuk ka pasur efekt të fuqishëm negativ këtë vit. Ne kemi interes ta mbështesim sektorin eksportues, por si bankë qendrore e vlerësojmë kursin e këmbimit si një faktor që ndikon pozitivisht ose negativisht në inflacion. Mbiçmimi i kursit të këmbimit ka efektin e tij negativ në normën e inflacionit të synuar që ne si bankë qendrore e kemi objektiv të përcaktuar me ligj. Kursi i këmbimit është shfaqur i stabilizuar, i mbiçmuar por i stabilizuar. Praktikisht ne e monitorojmë. Nuk dua të përsëris çka kemi thënë më parë por nuk jemi në nivelet e ndërhyrjes. Këto ditë kursi i këmbimit ka pasur një nënçmim, pra euro ka filluar të fitojë pikë ndaj lekut”, – deklaroi Sejko.
