Robert Lili, emërohet Drejtori i ri i Autoritetit Kombëtar të Ushqimit

Robert Lili, është emëruar Drejtor i ri i Përgjithshëm i Autoritetit Kombëtar të Ushqimit (AKU).Në mbledhjen e sotme të Qeverisë është marrë vendim për lirimin nga detyra të Drejtorit të Përgjithshëm të AKU-së, Agron Hetoja, me propozim të Ministrit të Bujqësisë dhe Zhvillimit Rural dhe emërimin në vend të tij të Robert Lilit.Ky vendim është marrë në kuadër të procesit të ristrukturimit që do t’i bëhet AKU-së, ndryshimeve ligjore që pritet të kalohen në Parlament dhe gjithë transformimit që do të pësojë institucioni më i rëndësishëm i sigurisë ushqimore në vend.

Në një njoftim për shtyp Ministria e Bujqësisë dhe Zhvillimit Rural shpreh falenderime për kontributin e deritanishëm dhe punën në drejtimin e AKU-së të ish-drejtorit Hetoja dhe shpreh besimin se drejtori i ri, do të çojë përpara procesin e transformimit të AKU-së dhe do të vijojë me vendosmëri punën për rritjen e sigurisë ushqimore në vend.

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.