Reagon SHBA: Rama, Meta dhe Basha ranë dakord… Koha për veprime të qeta; Mbështesim qeverinë në luftën kundër COVID-19
Sot është koha për veprime të qeta dhe praktike nga publiku. Kështu apelon Ambasada Amerikane në Tiranë teksa ka reaguar për situatën e shkaktuar nga COVID-19.
Selia diplomatike shton se Kryeministri, Presidenti dhe lideri i opozitës janë dakordësuar për luftën kundër koronavirusit.
Ambasada shkruan se SHBA-të do të vijojnë mbështetjen nga përpjekjeve të qeverisë shqiptare dhe se duhen ndjekur rekomandimet nga OBSH.
“COVID-19 kërkon që cilido në Shqipëri – pavarësisht se kush je – të bashkohet në frymë dhe në veprime. Ashtu si Presidenti Meta, Kryeministri Rama dhe Kryetari i Partisë Demokratike Basha ranë dakord së bashku, kjo është një kohë për veprime të qeta dhe praktike nga publiku, dhe veprime të shpejta e të përgjegjshme nga të gjithë udhëheqësit.
Në këtë drejtim, edhe Ambasada do të zbatojë masat mbrojtëse bazë ndaj COVID-19 të rekomanduara nga OBSH-ja, përfshirë mbajtjen e largësisë midis personave dhe masa të rritura personale higjenike, si larja e shpeshtë e duarve.
Do të vijojmë të mbështesim përpjekjet e qeverisë së Shqipërisë për të udhëhequr një përgjigje të bashkërenduar dhe transparente, e cila i mban të gjithë njerëzit në Shqipëri sa më të sigurtë, të shëndetshëm dhe të informuar që të jetë e mundur” – shkruan në deklaratën e saj ambasada e SHBA në Tiranë.
