Gjatë mbledhjes së sotme të qeverisë, Kryeministri Edi Rama ndau detyrat disa prej ministrave të kabinetit të tij, lidhur me situatën e jashtëzakonshme të shpallur në Tiranë, Durrës dhe Laç, pas tërmetit shkatërrues të 26 nëntorit. Ai ngarkoi ministrin e Bujqësisë, Bledi Çuçi, si personin në krye të operacionit për fatkeqësinë natyrore të shkaktuar nga tërmeti dhe si ‘komisarin e plotfuqishëm’ që do të monitorojë situatën e jashtëzakonshme.
Gjatë fjalës së tij ai i kërkoi ministrit për Diasporën, Pandeli Majko, dhe ministrit të Jashtëm, Gent Cakaj, të qëndrojnë të përditësuar dhe në kontakt me të gjitha kanalet e komunikimit me botën jashtë dhe me të gjithë shqiptarët, ndërsa urdhëroi ministren e Infrastrukturës, Belinda Balluku, dhe krye bashkiakun e Bashkisë së Tiranës, që të bëjnë me urgjencë listën me apartamentet bosh në Tiranë dhe Durrës.
Rama tha se brenda vitit 2020 nuk duhet të ketë më asnjë diskutim që të gjithë ata persona që kanë humbur shtëpitë nga tërmeti, të jenë të rregulluar më mirë se sa ishin. “Nesër do marrim vendimin e parë për të gjitha familjet që kanë humbur njerëz. Për ta nesër duhet këtu në tryezë një paketë speciale e drejtpërdrejtë”, tha kryeministri Edi Rama.
