Gjatë vitit 2020 borxhi publik neto parashikohet të reduktohet rreth nivelit prej 62% e Prodhimit të Brendshëm Bruto nga rreth 64% i pritshëm për vitin 2019.
“Konsolidimi fiskal do të vijojë edhe në periudhën afatgjatë, në përputhje me objektivin afatgjatë të stimuluar në ligjin organik të buxhetit për reduktim e borxhit publik poshtë nivelit prej 45% të PBB-së dhe mbajtjen e tij poshtë këtij niveli”, thuhet në relacionin e p/buxhetit për vitin 2020.
Në të njëjtën kohë, ky konsolidim fiskal në terma të borxhit publik dhe deficitit, sipas p/buxhetit, do të vijojë të shoqërohet me një kompozim të shëndetshëm midis shpenzimeve korrente dhe investimeve publike.
Shpenzimet për investime publike të programuara në buxhetin e vitit 2020, si dhe në periudhën afatmesme vijojnë të jenë mbi 4.5% e PBB-së, nivel i cili është mesatarisht rreth 3% e PBB më tepër se sa defiçiti buxhetor i targetuar. /a.gjonaj/j.p/
