Sot në mesditë në portin e Durrësit u akostua anija “Solstice N”, e cila mbërrin në Durrës për të dytën herë brenda 10 ditëve.
Ajo iu shtua edhe katër anijeve të tjera tregtare që po përpunohen aktualisht në portin më të madh të vendit. Anija me gjatësi 223 m tashmë ndodhet në molin 6, ku do të nisë edhe përpunimi i 700 kontejnerëve me mallra.
Qendra e Informacionit në APD, bën me dije, se në Terminalin Perëndimor sot në mesditë vijon përpunimi i tri anijeve me rreth 6500 tonë mallra të ndryshme, si xhama, bërsi soje dhe çimento.
Ndërkaq, në kalatën nr. 10 po shkarkohen 5252 tonë qymyr nga anija “Ust Ilimsk”.
Nga Qendra e Informacionit, mësohet gjithashtu se në ditët e ardhshme pritet të mbërrijnë edhe tri anije me rreth 8 mijë tonë mallra, kryesisht xhama dhe makineri.
