Milani nuk ka shkuar më shumë sesa një barazim 1-1 kundër Udinezes, duke konfirmuar momentin jo të mirë që po kalon. Sot kuqezinjtë kishin mundësinë të parakalonin në renditje Interin në vendin e tretë, por barazimi u ka dhënë një asist “kushërinjve” që të shkojnë në +4 nesër nëse mundin Genovan në transfertë. Ndërkohë, edhe vendi i katërt është në rrezik, pasi Lazio, që ende nuk e ka luajtur sfidën e saj ndaj SPAL-it, mund të shkojë në -1 pikë nga Milani në rast triumfi.
Në sfidën e luajtur pak çaste më parë në “San Siro”, kuqezinjtë kanë luajtur më mirë sesa rivali, ndërsa kanë kaluar në epërsi të parët në fund të pjesës së parë, kur i zakonshmi Piatek shënon gol në minutën e 44-ët. Në pjesën e dytë, Milani i shkon pranë dyfishimit, por lë hapësira pas dhe në aksion ideal për kuqezinjtë për të shkuar në 2-0, Udineze shpërthen në një kundërsulm vdekjeprurës me Fofanën, që finalizohet saktë nga Lazanja në të 65-ën.
Më pas të besuarit e Gatuzos hidhen të gjithë në sulm në kërkim të golit të fitores, por pavarësisht presionit të madh, nuk do të arrijnë dot të çajnë mbrojtjen e ngjeshur të bardhezinjve, të cilët marrin një pikë jetike në luftën për mbijetesë.
