Ulja e papunësisë regjistroi një rekord të ri në tremujorin e fundit të vitit të kaluar.
Instat raporton se shkalla zyrtare e papunësisë zbriti në 11.2%, 0.2 pikë përqindje më pak krahasuar me tremujorin e tretë.
Ky është njëkohësisht edhe niveli më i ulët i regjistruar në 30 vitet e fundit në ekonominë shqiptare.
Papunësia vazhdoi të bjerë edhe në një vit kur ekonomia e ngadalësoi ndjeshëm rritjen.
Mbështetur në të dhënat e tremujorëve të parë, ekonomia shqiptare u rrit me mesatarisht 3%, nga rreth 4.1% që pati qenë rritja e vitit 2018.
Megjithatë, ngadalësimi i ekonomisë vitin e kaluar dhe rreziqet në rritje për vitin 2020 duket se ende nuk po reflektohen në shifrat e tregut të punës.
Përkundrazi, papunësia është ulur dhe shkalla e punësimit për popullsinë në moshë pune është rritur më tej në 61.6%.
Me bazë vjetore, punësimi është rritur me 3.1% i mbështetur kryesisht nga sektori i industrisë.
Ashtu si papunësia, edhe shkalla e punësimit ka arritur një nivel rekord për 30 vitet e fundit.
Mund të hipotizohet se tendenca e emigrimit të popullsisë në vitet e fundit, sidomos mes të rinjve, e ka tkurrur ndjeshëm kontigjentin e punëkërkuesve potencialë, duke ndikuar në përmirësimin e treguesve të punësimit në ekonomi.
Integrimi i të rinjve në tregun vendas të punës ngelet i vështirë dhe shkalla e papunësisë mes tyre është 21.4%, pothuajse dy herë më shumë krahasuar me papunësinë mesatare.
