Ndërsa COVID-19 është problemi kryesor aktual, Organizata Botërore e Shëndetit paralajmëroi se botës i duhen gati gjashtë milion infermierë.
Agjensia e shëndetësisë së Kombeve të Bashkuara së bashku me partnerët Nursing Now dhe Këshilli Ndërkombëtar i infermierëve (ICN) nënvizuan në një raport rolin thelbësor të luajtur nga infermierët, të cilët përbëjnë më shumë se gjysmën e të gjithë punonjësve shëndetësorë në të gjithë botën.
Infermierët janë shtylla kurrizore e çdo sistemi shëndetësor,” tha shefi i OBSH-së Tedros Adhanom Ghebreyesus në një deklaratë. “Sot, shumë infermierë e gjejnë veten në vijën e parë në betejën kundër COVID-19,” vuri në dukje ai, duke shtuar se ishte jetësore që ata “të marrin mbështetjen e nevojshme për të mbajtur botën të shëndetshme”.
Raporti thoshte se ka vetëm nën 28 milion infermierë në planet. Në pesë vite deri në 2018, numri u rrit me 4.7 milion.
“Por kjo ende lë një mungesë globale prej 5.9 milion,” tha OBSH, duke theksuar se boshllëqet më të mëdha ishin në vendet më të varfra në Afrikë, Azinë Juglindore, Lindjen e Mesme dhe pjesë të Amerikës së Jugut.
Raporti u bëri thirrje vendeve të identifikojnë boshllëqet në fuqinë e tyre të punës infermierore dhe të investojnë në edukimin e kësaj fushe.
Shefi ekzekutiv i ICN Howard Catton tha në një konferencë virtuale se shkalla e infeksionit, gabimet e ilaçeve dhe shkalla e vdekshmërisë “janë të gjitha më të larta atje ku ka shumë pak infermierë”. Për më tepër, “mungesat shterojnë fuqinë punëtore aktuale të infermierisë”, shtoi ai.
Tetëdhjetë përqind e infermierëve në botë aktualisht i shërbejnë vetëm 50 përqind të popullsisë në total. (AFP)
