Shqipëria e ka humbur takimin ndaj Turqisë me rezultatin 0-2. Një rezultat shumë zhgënjyes ky për Kombëtaren, që ka bindur deri diku me lojën e saj.
“Urban News” publikon notat e lojtarëve titullarë të kuqezinjve, me interpretimin e saj duke parë atë që është shfaqur në fushë:
Berisha(4)- Një mbrëmje e errët për gardianin e Kombëtares. Dy goditje në portë dhe të dyja që shkojnë në rrjetë. Madje edhe në një goditje të tretë të Turqisë kur ishte ngritur flamuri për pozicion jashtë loje, sërish topi shkon në fundin e rrjetës.
Ardian Ismajli(6.5)- Më i miri i Kombëtares! Në mbrojtje, mesfushë dhe sulm. Me Ardian Ismajlin kundërshtarët nuk fituan asnjë duel të vetëm. .
Berat Gjimshiti(5)- Një lojë mesatare e mbrojtësit të Atalantës, që mund të bënte shumë më mirë në lojën e tij. Në golin e parë të pësuar, gabon pafundësisht me atë top të dhënë Xhakës, që e vendos në presion më kot, kur kishte edhe zgjidhje të tjera.
Frederik Veseli(4.5)- Nuk bind aspak me lojën e tij. Pavarësisht se Veseli luan gjithmonë titullar te Empoli, me Kombëtaren nuk e gjen formën më të mirë. I lehtë për t’u kaluar!
Hysaj (5)- Shiriti i kapiteni shërben që lojtari të veçohet nga pjesa tjetër e skuadrës, por shkodrani nuk e arrin magjinë as në shtëpinë e tij. Ndikon edhe forma jo e mirë te Napoli. Nuk bën shumë gabime.
Balliu (5)- Në mënyrë surprizuese futet në formacion dhe lë një shije deri diku të mirë.
Memushaj(4.5)- Nuk ishte në mbrëmjen e tij! Vlonjati ka disa ndeshje që nuk po luan dhe nuk po gjen formën e tij te Shqipëria..
Xhaka(5)- Di t’i bëj të gjitha brenda 90 minutash, “të mirin” dhe “të keqin”. Në golin e parë, ishte Gjimshiti që e nxori si fajtor me atë top të ngecur. Në disa momente i jep frymëmarrje skuadrës dhe në të tjera e tepron me mbajtjen e topit.
Uzuni(6)- Një nga futbollistët më të mirë të Shqipërisë. Me Lokomotivën e Zagrebit ka treguar një nivel të jashtëzakonshëm, ndërsa edhe me Kombëtaren përpiqet ta bëj një gjë të tillë.
Abrashi(5.5)- Kthehet pas një kohe të gjatë mungese te Kombëtarja. Të gjithë e prisnin me një interes të jashtëzakonshëm, por mesfushori i Frajburgut nuk është në gjendjen më të mirë.
Balaj(4.5)- Kjo është Shqipëria! Në ato pak raste që krijon, nuk duhet t’i fal. Balaj e bën këtë gjë, duke e falur kundërshtarin. /UrbanNews.al
