Viti 2019 nuk ka për t’u harruar lehtë nga shqiptarët. Kjo sepse ka qenë i mbushur me ngjarje, të cilat për fatin tonë, ndikuan dhe do të ndikojnë në jetët e gjithësecilit edhe në të ardhmen. Në vendin tonë ndodhën ngjarje vendimtare, që nga lënia e mandatave të opozitës dhe dalja nga parlamenti, tërmeti i 26 nëntorit, refuzimi i hapjes së negociatave me BE-në, zgjedhjet vendore pa opozitën, e po ashtu u krijuan institucione, nga të cilat pritet një drejtësi e pavarur dhe e shëndoshë.
Viti 2019 ka qenë një vit me ngjyra politike të theksuara. Më shumë se sa politika, vëmendjen e ka marrë drejtësia me ngritjen e Prokurorisë së Posaçme Anti Korrupsion, si momenti kulmor dhe më domethënës i vitit. Mënyra me të cilën një regjim politik përqaset ndaj sistemit të drejtësisë është një indikator i cilësisë së demokracisë në vend. Në terma afatgjatë, ekzistojnë të paktën tri rrjedhoja si rezultat i ngritjes së SPAK-it. Pikë së pari kjo do të sjellë një shoqëri më të drejtë dhe rrjedhimisht më të mirë; do të përmbyset bindja në publik e paprekshmërisë së të ’’fortëve’’ dhe do të dekonstruktojë mitet që lidhen me ndikimin qendror të Bashkimit Europian duke i dhënë aktorëve vendorë peshën kryesore dhe realiste. Rrjedhimisht, do të kuptohet që presionet nga prania e një modeli apo ‘transpozimi i acquis communitaire’, janë një nga indikatorët për rritjen e cilësisë në një fushë që është tipike e çështjeve të brendshme të shtetit.
*Ish-zv/ministre e Drejtësisë. Drejtore e Fondacionit ‘Qemal Stafa’
