Nesër do të regjistrohet në gjykatë dhe më pas në Komisionin Qendror të Zgjedhjeve partia e re ‘Bindja Demokratike’ me kryetar Astrit Patozin. Lajmi konfirmohet nga Fabian Topollaj, anëtar aktual i këshillit bashkiak të Tiranës dhe i njohur si kritik i fortë i Lulzim Bashës. Themeluesit e partisë së re janë; Leonard Olli, Fabian Topollaj, Ardian Kollozi dhe të tjerë.
“Bindja Demokratike’ do marrë pjesë në zgjedhje. Unë do të jem anëtar i ‘Bindjes Demokratike’. Po përgatisim dokumentacionin, nesër e dorëzojmë në gjykatën” tha Astrit Patozi
Fillimisht u përmend emri i Rudina Hajdarit si kryetare e partisë, por vajza e Azem Hajdarit, aktualisht kryetare e grupit demokrat në Kuvendin e Shqipërisë e mohoj . Sipas informacioneve Astrit Patozi, ish-n/kryetar i PD-së në kohën e Berishës do të drejtojë partinë ‘Bindja Demokratike’.
Patozi i njohur për divergjencat e forta me kryetarin aktual të PD-së, pritet që të mbledhë në subjektin e ri ‘gardën’ e vjetër që u largua nga Lulzim Basha para zgjedhjeve të qershorit të 2017, por edhe të zhgënjyerit nga lidershipi i partisë më të madhe opozitare në Shqipëri.
Themeluesit e partisë së re ‘Bindja Demokratike’ që pasditen e sotme po zhvillojnë mbledhjen e fundit para dorëzimit të kërkesës në gjykatë me 3 mijë firma do të jenë; Leonard Olli, Fabian Topollaj, Ardian Kollozi dhe të tjerë. Kjo është partia e parë që krijohet nga përçarja e demokratëve nga drejtimi i Lulzim Bashës.
E ndërsa lideri demokrat Lulzim Basha është shprehur i vendosur që të pengojë zhvillimin e zgjedhjeve lokale të 30 qershorit 2019, të cilat sipas tij nuk mund të mbahen pa opozitën, por vendos tre kushte për pjesëmarrjen, ‘Bindja Demokratike’ nesër regjistrohet për futjen në zgjedhjet lokale.
Endira Bushati ishte një nga emrat që u lakua në media si pjesë anëtarëve që po themelojnë partinë e re ‘Bindja Demokratike’. Por në një reagim në faqen e saj në Facebook, ish-kryetarja e AMA-s dhe Këshillit Kombëtar të Partisë Demokratike e mohon. Ajo thotë se vijon që të jetë kundër mënyrës sesi Basha po e drejton PD-në, por sado që mundë të mbështesë projekte të reja është e fokusuar te karriera akademike dhe profesionale.
“Për shumë kohë, kam folur e shkruar mbi median dhe rolin e saj në Shqipëri, për mënyrën se si “shiten” lajme pa u verifikuar dhe pa më të voglën etikë profesionale….Ka rreth 2 orë që gazetarë, kolegë e miq, më njoftojnë se unë qenkam “themeluese” e një partie….Nuk po u vë faj për një arsye të thjeshtë: Është e vërtetë që unë jam shprehur kundër mënyrës së drejtimit të PDsë nga Lulzim Basha….
Vazhdoj t’u qëndroj të gjithave çfarë kam thënë që pas humbjeve të zgjedhjeve të 2017! Dhe kam pasur bindjen, që herët a vonë, vakuumi i krijuar në frontin opozitar do të plotësohej me forca të tjera politike….Por….(dhe ka një “por” të madhe)….Sado që unë, mund të mbështes apo përkrah, programe, njerëz, projekte….Më duhet të sqaroj se aktualisht jam tërësisht e fokusuar në karrierën akademike dhe profesionale….” shkruan ajo.
