Ministrja e Arsimit, Rinisë dhe Sortit duke iu përgjigjur pyetjeve të maturantëve në nëj komunikim të drejtpërdrejtë ka dhënë njoftimin se festa simbol, e mbarimit të gjimnazit, mbrëmja e maturës, do duhet të anullohet.
Kjo festë sipas ministres nuk mund të realizohet, pasi nuk respektohen masat e distancimit social, prandaj duhen gjetur forma të tjera.
Sa i përket rikthimit në shkollë më 18 maj, Shahini ka njoftuar se kush mendon se mund t’i bëjë provimet pa pasur nevojë për konsultime, atëherë nuk është e nevojshme që të rikthehen në bankat e shkollës, por duhet të njoftohet drejtori i shkollës, para 11 majit, që të planifikohet ulja e nxënësve në klasa për të ruajtur distancimin social. Në tre javët që janë planifikuar rikthimi në shkollë, nuk përfshihen të shtunat dhe të dielat. Që do të thotë se fundjava do të jetë pushim, si gjithmonë.
Duke u ndalur tek provimet, Shahini ka njoftuar se në dispozicion të maturantëve duke filluar nga nesër (e hënë, 4 maj) do të ketë komunikime të përditshme nga ana e Rezana Vrapi, drejtore e Qendrës së Shërbimeve Arsimore (QSHA) mbi elemente dhe detaje të ndryshme të këtij provimi. Ajo shprehet se “paralelisht, platforma akademi.al ka xhiruar pyetje dhe zgjidhje të detyrave për provimet kryesore në matematikë dhe shkenca, të cilat do t’i transmetojnë në RTSH.
Maturantët që kanë mbetur të bllokuar jashtë vendit, duhet të presin edhe pak, sqaron ministrja, pasi në datën 11 maj pritet të merret një vendim për hapjen ose jo të kufijve. Nëse nuk do të hapen kufijtë, atëherë mësimi do të vijojë online.
