Mbledhje e KLP-së
Këshilli i Lartë i Prokurorisë emëroi 8 anëtarët e Strukturës së Posaçme Anti-Korrupsion të cilët do të hetojnë funksionarët e lartë të shtetit për aktet korruptive.
Ashtu siç ishte paralajmëruar, KLP-ja i hap rrugën ngritjes së strukturës speciale, e cila do të përbëet nga: Altin Dumani, Arben Kraja, Behar Dibra, Edvin Kondilli, Elida Kaçkini, Ened Nakuçi, Enkeleda Millonai dhe Klodian Braho. Secili prej tyre do të ketë një mandat 9-vjeçar. KLP-ja miratoi me 11 vota pro emërimin e tyre, ndërsa nga ana tjetër është hapur gara për kreun e SPAK-ut, çështje e cila do të mbyllet pas 15 ditësh.
Për t’u konfirmuar në detyrën e re, të tetë anëtarët duhet të betohen përpara presidentit Meta në 19 dhjetor.
Të gjithë anëtarët e SPAK-ut kanë kaluar me sukses të dyja etapat e vettingut si dhe kanë rezultuar korrektë për sa i përket deklarimit të pasurisë, pastërtisë së figurës dhe aftësive profesionale.
Faktori ndërkombëtar ka ushtruar presion të madh për ngritjen e SPAK-ut, pasi për herë të parë në historinë e Shqipërisë krijohet një organ i posaçëm për hetimin e zyrtarëve të lartë të pushtetit qendror dhe lokal.