Ishte pikërisht kreu i qeverisë, Edi Rama, ai që mbërriti i pari në ambientet e vilës (rreth orës 8.30) duke zgjedhur që kësaj herë të presë të gjithë socialistët që do t’i bashkoheshin takimit.
Vazhdon mbledhja e kryeministrit Edi Rama me socialistët. “Retreat-i” (tërheqja) që po zhvillohet në rezidencën qeveritarene Dajt ka nisur që prej orës 10.00 të mëngjesit, e pritet që të përfundojë në orën 18.00. Ishte pikërisht kreu i qeverisë, Edi Rama, ai që mbërriti i pari në ambientet e vilës (rreth orës 8.30) duke zgjedhur që kësaj herë të presë të gjithë socialistët që do t’i bashkoheshin takimit.
Në këtë mbledhje po bëhet një analizë pune për secilin prej sektorëve që është zgjedhur për t’u diskutuar, të cilët janë: integrimi, komunikimi, siguria, çështje sociale, administrata publike, por edhe zgjedhjet parlamentare që do të mbahen disa muaj më vonë, në pranverën e vitit që vjen.
Aktualisht, para kryeministrit kanë raportuar kryenegociatoja Majlinda Dhuka për çështjet e integrimit, por edhe përfaqësues nga administrata publike. Lidhur me çështjen e komunikimit ka folur Endri Fuga, këshilltari për mediat i kryeministrit Edi Rama. Sipas gazetarit Osman Stafa, Fuga ka folur për rëndësinë e komunikimit të deputetëve e ministrave në rrjetet sociale. Ky komunikim, sipas Fugës, duhet që të intensifikohet sidomos për faktin që para janë zgjedhjet parlamentare të 2025.
Megjithatë lidhur me çështjen e zgjedhjeve më shumë pritet që të mësohet më 8 shtator, datë në të cilën Partia Socialiste do të zhvilloje mbledhjen e Asamblesë, ku me shumë gjasa mund të ketë ndryshime të të dërguarve politikë në disa qarqe të vendit. Por deri më tani nuk ka asnjë emër të konfirmuar zyrtarisht nga radhët e Partisë Socialiste. Mbetet për t’u parë edhe hapësira në terren që do u besohet ministrave që i janë bashkuar rishtazi kabinetit të kryeministrit Rama.
Një tjetër detaj që është mësuar nga mbledhja që tashmë është drejt përfundimit, është fakti që kreu i qeverisë, Edi Rama nuk do të ketë një dalje për mediat për të raportuar atë që është diskutuar. 8 orë fjalime e prezantime duket se do të jenë ‘ekskluzivitet’ i të pranishmëve në mbledhje.
Ndoshta më shumë detaje do të zbulohen në mbledhjen e Asamblesë.
