I ftuar për të folur rreth masave të marra nga Bashkia Tiranë në emergjencën e koronavirusit ishte në “Argument” zv.kryetari i Bashkisë, Arbër Mazniku.
Ai është shprehur se Bashkia gjithashtu ka marrë masa ekonomike për të përballuar sfidën:
“Një paketë ekonomike është bërë, prandaj para pak ditësh kemi hequr për një pjesë të tarifave, pra taksa për hapësirën publike për 3 muajt e ardhshme është pezulluar. Tarifat e lidhura me shërbimet që nuk ofrohen gjatë kësaj periudhe janë pezulluar. Kjo padyshim do ketë efekt në Buxhetin tonë. Gjithashtu kemi eliminuar kamat-vonesat e ujësjellësit, që mund të duket si diçka e vogël, por ofron mundësinë që qytetarët mund t’i paguajnë faturat në çdo moment, duke pritur normalitetin.
Transporti publik funksionon vetëm me orare, me të cilat lëvizin stafet e spitaleve. Transporti në tokë është lejuar vetëm për këtë kategori, ndërkohë funksionet e tjera të transportit publik janë pezulluar.
Një pyetje e ardhur nga qytetarët ishte edhe nëse Bonusi i tërmeteve për qiratë e banesave do të prekej nga situata e koronavirusit, z.Mazniku është përgjigjur kështu:
“Bonusi i qirasë për tërmetet vazhdon dhe qytetarët kanë pasur mundësi ta tërheqin nëpërmjet bankës. Bashkia e Tiranës ka miratuar gjithashtu një paketë për fondin e emrgjencës e fokusuar te familjet në nevojë. Pra, ne po marrim një kosto specifike me situatën e COVID.”
Gjithashtu dezinfektimi i qytetit po vazhdon normalisht u shpreh zv.kryetari Mazniku:
“Në mënyrë masive dhe sistematike po ndodh në të gjithë rrugët e qytetit dezinfektimi. Një vendim i Këshillit ndryshoi dhe shtoi buxhetin për këtë punë, që të kemi mundësi ta bëjmë këtë proces në mënyrë masive. Po dezinfektohen objektet me funksione publike, por edhe rrugët e qytetit. “ – u shpreh ai.
