Ish Ministri i Drejtësisë, Ylli Manjani me anë të një postimi në rrjetin social Facebook ka shkuar për zëvendësimin e listës së deputetëve të rinj në parlament. Ai sjell në vemendje fletën e votimit dhe thotë se qytetarët kanë votuar partitë dhe jo emrat në listën e tyre.
“Të vetmit emra që mund të themi se janë zgjedhur janë ato të kryetarëve të partive që janë djathas fletës. Asnjë emër tjetër, po asnjë fare! Nuk është zgjedhur as Lefter Koka e madje as Sali Berisha, Monika Kryemadhi apo Taulant Balla e Gramoz Ruçi me shokë…. Askush përveç partive dhe kryetarëve të tyre nuk është zgjedhur. Le pastaj të pretendosh që populli paska zgjedhur fundlistësit Ylli Shehu, Edmond Rrushi, Kujtim Gjuzi, Ralf Gjoni e te tjerë që s’ua dimë as emrat.” Shkruan Manjani ndërsa shton se ky është sistemi i votimit që kemi.
“ Ndaj ato deklaratat e renegatëve që “më ka votuar populli” janë palaçollëk politik e juridik! Le pastaj ata që deklarojnë se “ju ka thënë Amerika dhe Europa…” E përsëris: ligjet përcaktojnë si zëvendësohen emrat, por jo partitë në Parlament! Ky është sistemi i partive jo i emrave, për të mirë apo për të keq!” – përfundon Manjani postimin e tij.
