Inspektorati Shtetëror i Mbikëqyrjes së Tregut (ISHMT) bën me dije se janë inspektuar një pjesë e madhe e ashensorëve në Tiranë dhe janë konstatuar të sigurt për t’u vendosur në punë, megjithatë i bën thirrje qytetarëve të kenë kujdes.
“Pavarësisht këtij lajmërimi, duke qenë se jemi në moment të lëkundjeve të vazhdueshme sizmike, në rastin e goditjeve të larta sizmike të mundshme, verifikimi duhet të ripërsëritet dhe ashensori nuk duhet të vendoset në punë deri sa të realizohet sërish ky proces”, – thuhet në njoftimin e ISHMT.
Inspektorati kërkon përgjegjshmëri maksimale nga administratorët e pallateve dhe instaluesit e ashensorëve.
“Ky njoftim për t’u zbatuar nga personat përgjegjës për instalimet në zonat e prekura në Tiranë dhe qytetet e tjera duke përjashtuar Durrësin, Thumanën dhe zonat e tjera në epiqendër të tërmetit, ku instalimet sipas vlerësimeve të deritanishme kanë pësuar dëmtime serioze dhe duhet të kalojnë një vlerësim të detajuar dhe të specializuar”, – thuhet në njoftim.
