Presidenti i Republikës Ilir Meta ka vlerësuar legjendën e “Labinotit” (sot Elbasani), dhe të “Partizanit”, si dhe të ekipit tonë Kombëtar, Mihal Gjikën, me Titullin i lartë ‘Mjeshtër i Madh’.
Përveç kontributit me Partizanin dhe Elbasanin, Mihal Gjika me fanellën kuqezi kujtohet për ndeshjet me të dyja Gjermanitë e asaj kohe, Rumaninë, Poloninë, Turqinë, Finlandën e shumë të tjera, që i rritën autoritetin sportiv dhe respektin e merituar të sportdashësve.
Postimi i Presidentit:
Të paharruara do të mbeten talenti, virtuoziteti, sukseset dhe rezultatet e shkëlqyera sportive të arritura nga futbollisti aq popullor dhe i pamposhtur Mihal Gjika, mjeshtri i mbrojtjes së ‘Labinotit’, ‘Partizanit’ dhe Ekipit Kombëtar.
Energjik dhe plot autoritet në çdo ndeshje të luajtur, betejat e ‘Lakes’ në fushën e blertë kujtohen edhe sot nga sportdashësit, veçanërisht për faktin se në çdo dyluftim ai dilte fitimtar, aq sa sulmuesit e të gjitha skuadrave duhet t’i bënin mirë llogaritë përpara se të ballafaqoheshin me mbrojtësin legjendar.
Në kujtesën e tifozëve janë memorizuar kryesisht debutimet e shkëlqyera të Mihal Gjikës në ndeshjet me të dyja Gjermanitë e asaj kohe, Rumaninë, Poloninë, Turqinë, Finlandën e shumë të tjera, që i rritën autoritetin sportiv dhe respektin e merituar të sportdashësve.
Në vlerësim të talentit, lojës së dalluar, shpirtit të rrallë të garës dhe rezultateve të jashtëzakonshme, që ngritën lart emrin e “Labinotit”, “Partizanit” dhe Ekipit Kombëtar, pata nderin të çmoj Mihal Gjikën, me Titullin i lartë ‘Mjeshtër i Madh’.
Karriera e tij e suksesshme frymëzon edhe sot të rinjtë e të rejat e Elbasanit për të ecur në gjurmët e kësaj trashëgimie të vyer sportive.
