Arton Zekaj është zyrtarisht lojtari më i ri i Kosovës, ndërsa do t’i bashkohet grupit të lojtarëve U-21 që drejtohen nga Prekazi. Një rast i rrallë ky i këtij lojtari, që më parë ka përfaqësuar grupmoshat e Serbisë.
Kartoni i tij zotërohet nga Lille, që në këtë sezon arriti mrekullinë, për t’u kualifikuar në “Champions League”. Megjithatë për debutimin e Zekajt me Kosovën duhet të presim shtatorin, pas një dëmtimi të fundit që ia ndalon hyrjen në fushë. Për faqen zyrtare të FFK-së, Zekaj u shpreh:
“Për mua është krenari e madhe që e kam zgjedhur Kosovën dhe që do ta veshë këtë fanellë, pasi në këtë mënyrë do t’i bëj krenar prindërit e mi, familjen time dhe krejt popullin e Kosovës, e gjithashtu edhe një njeri të madh që më nuk është në mesin tonë – legjendën, Fadil Vokrri.
Të ardhmen çdo herë duhet ta shikoj për të arritur majat në futboll, qoftë në nivel klubesh, qoftë në nivel të kombëtareve. Normalisht, të gjithë lojtarët kanë dëshirë për të luajtur për Kombëtaren e parë, por hap pas hapi, lojë pas loje do të shohim si do të ecën gjërat. Mua më mbetet që t’i tregoj cilësitë e mia dhe te Kombëtarja U21 do të jap maksimumin tim, pastaj janë trajnerët ata që vendosin.
I kam shikuar të gjitha ndeshjet e Kosovës dhe jam shumë i lumtur me lojërat dhe rezultatet që i kanë treguar djemtë tanë. Ajo që më pëlqen më shumë te Kosova është fakti që të gjithë luajnë si grup dhe që luajnë me zemër, derisa tifozët janë fantastik. Me një fjalë krejt populli është përkrah ekipit kombëtar. Pres që do të arrijmë të kualifikohemi në Evropian, por mbetet të shohim si do të shkojnë gjërat”, ka nënvizuar Zekaj.
Në edicionin e ri do të jemi edhe në Ligën e Kampionëve me Lile dhe jam shumë i entuziazmuar për këtë fakt. Konkurrenca çdo herë është shumë e fortë, por unë jam më i riu në ekip dhe duhet të punoj shumë për ta treguar veten që ta siguroj vendin në ekip. Gjithsesi, tash për tash kryesorja është që të rehabilitohem sa më shpejtë nga lëndimi dhe të rikthehem me 100 qind të forcës në stërvitje”,ka thënë Zekaj.
