Kreu i OSBE-së, Rama: Forcim i dialogut për nxitjen e barazisë gjinore dhe fuqizimin e grave dhe vajzave

Në prag të Ditës Ndërkombëtare të Grave, drejtuesit e lartë të Organizatës për Siguri dhe Bashkëpunim në Europë (OSBE) bënë thirrje për më shumë përpjekje në promovimin e barazisë gjinore dhe për dialog mes brezash për të garantuar përfshirjen e të rinjve.
Dita Ndërkombëtare e Gruas këtë vit përkon me 20-vjetorin e Rezolutës 1325 të Këshillit të Sigurisë së Kombeve të Bashkuara për Gratë, Paqen dhe Sigurinë dhe 25-vjetorin e Platformës së Pekinit për Masa për Avancimin e Grave dhe këto ngjarje janë një mundësi për të analizuar progresin e shënuar deri më sot, deklaruan zyrtarët e OSBE-së.
Kryetari i radhës së OSBE-së, Edi Rama, Kryeministri i Shqipërisë dhe Ministër për Europën dhe Punët e Jashtme, Sekretari i Përgjithshëm i OSBE-së, Thomas Greminger, dhe Drejtoresha e Zyrës së OSBE-së për Institucione Demokratike dhe të Drejtat e Njeriut (ODIHR), Ingibjörg Sólrún Gísladóttir, theksuan se për nxitjen e barazisë gjinore është e rëndësishme që të dëgjohen përvoja dhe opinione të ndryshme dhe vunë në pah veçanërisht nevojën për përfshirjen e djemve dhe vajzave të reja. Të rinjtë përfaqësojnë 38 për qind të popullsisë së rajonit të OSBE-së dhe kanë nevojë të përfshihen në përpjekjet për të avancuar barazinë gjinore, duke kontribuar kështu edhe në përpjekjet për paqe dhe siguri të qëndrueshme.
Kryetari i radhës së OSBE-së, Kryeministri i Shqipërisë dhe Ministër për Europën dhe Punët e Jashtme, Edi Rama u shpreh se “sfidat e barazisë gjinore si lufta kundër grave, garantimi i pjesëmarrjes së grave në parandalimin dhe ndëmjetësimin e konfliktit, pajtimin dhe nxitjen e fuqishme të mundësive të barabarta të grave në jetën sociale, ekonomike, publike dhe politike mund të përballohen vetëm nëse burrat dhe gratë e të gjitha moshave punojnë së bashku”.
Kryetari i radhës gjithashtu theksoi angazhimin e OSBE-së për të vazhduar të punojë për avancimin e barazisë gjinore, si dhe fuqizimin e grave dhe vajzave.
“Ne po punojmë së bashku me të gjitha vendet anëtare për të nxitur avancimin e ligjeve, politikave dhe mjeteve zbatuese në një nivel krejt tjetër për mbështetjen dhe mbrojtjen e të drejtave të grave”, deklaroi Rama.
Sekretari i Përgjithshëm i OSBE-së, Thomas Greminger vuri në dukje sfidat për përfshirjen e grave në proceset e paqes në zonën e OSBE-së: “Edhe pse sot, krahasuar me 25 vite më parë, ka më pak pabarazi gjinore në shumë fusha, përparimi ka qenë i ngadaltë. Në negociatat për paqe, gratë ende nuk kanë përfaqësim të konsiderueshëm. OSBE-ja është e përkushtuar në zbatimin e axhendës së grave, paqes dhe sigurisë, si dhe në përfshirjen e më shumë burrave dhe grave të reja në proceset e paqes”.
Duke iu referuar rëndësisë së teknologjisë dixhitale për të ardhmen e barazisë gjinore, drejtoresha e ODIHR, Gísladóttir deklaroi: “Tashmë kemi një brez të grave të reja, të cilat u rritën në botën dixhitale dhe po bëjnë që zërat e tyre të dëgjohen. Në fakt, të rinjtë kanë sens të zhvilluar se çfarë do të thotë barazi e vërtetë, gjë që më bën optimiste”.
“Në të njëjtën kohë, gratë, të cilat kërkojnë rol aktiv në jetën publike dhe politike, shpesh e gjejnë veten viktima të ngacmimit dhe abuzimit. Liderët politikë duhet të bëjnë më shumë për të siguruar që gratë dhe vajzat të jenë në gjendje të angazhohen në mënyrë të sigurt. Ato do të ndryshojnë të ardhmen dhe kanë nevojë për mbështetjen tonë”, shtoi ajo.
Rëndësia e dialogut ndër breza për barazinë gjinore, ishte gjithashtu fokusi i një ngjarjeje të OSBE-së, e organizuar në Vjenë nga Seksioni për Gratë, për të shënuar Ditën Ndërkombëtare të Grave. Pjesëmarrësit diskutuan se si gjenerata të ndryshme të grave dhe burrave i shohin mundësitë dhe sfidat dhe si ata mund të punojnë së bashku në mënyrë efektive, për të promovuar barazinë gjinore.