Ryan tha se shembujt e Kinës, Singaporit dhe Koresë së Jugut, të cilat shoqëronin kufizimet me masa rigoroze për të provuar çdo të dyshuar të mundshëm, siguruan një model për Europën, për të cilën OBSH ka thënë se ka zëvendësuar Azinë si epiqendrën e pandemisë
“Izolimi nuk mjafton për të mposhtur koronavirusin”, është shprehur kreu i Organizatës Botërore të Shëndetësisë , duke shtuar se masat e shëndetit publik janë të nevojshme për të shmangur një ringjallje të virusit pas pak kohësh. “Ajo në të cilën duhet të përqendrohemi është gjetja e atyre që janë të sëmurë, ata që kanë virusin dhe izolimi i tyre, si dhe gjetja e kontakteve të tyre”,tha Mike Ryan në një intervistë për BBC.
Nëse nuk zbatohen masat e forta të shëndetit publik, kur të hiqen kufizimet e lëvizjes dhe bllokimet e vendosura, rrezikojmë që ky virus të shfaqet sërish. Pjesa më e madhe e Europës dhe Shtetet e Bashkuara kanë ndjekur Kinën dhe vendet e tjera të Azisë, duke vendosur kufizime drastike për të luftuar koronavirusin e ri – duke lejuar shumicën e punëtorëve të punojnë nga shtëpia, duke mbyllur shkollat, baret, apo restorantet. Ryan tha se shembujt e Kinës, Singaporit dhe Koresë së Jugut, të cilat shoqëronin kufizimet me masa rigoroze për të provuar çdo të dyshuar të mundshëm, siguruan një model për Europën, për të cilën OBSH ka thënë se ka zëvendësuar Azinë si epiqendrën e pandemisë.
“Pasi të kemi ndaluar përhapjen e Covid- 19 në masë, ne duhet të kemi në fokus të luftojmë virusin duke ndjekur secilin të prekur deri në fund”, tha Ryan. Ai gjithashtu tha se disa vaksina ishin në zhvillim, por vetëm një kishte filluar testimin në Shtetet e Bashkuara. I pyetur se sa do të zgjasë para se të vihej në dispozicion një vaksinë në Britani, ai tha se njerëzit duhej të ishin realistë.
“Ne duhet të sigurohemi fillimisht, që vaksina të jetë efikase dhe më pas ta nxjerrim në treg, proces i cili do të kërkojë më së paku një vit”, u shpreh ai, duke vënë theksin edhe një herë tek masat paraprake që duhen ndërmarrë. Italia tani është vendi më i goditur në botë nga virusi, ndërkohë që kryeministri i Mbretërisë së Bashkuar, Boris Johnson ka paralajmëruar se sistemi shëndetësor i Britanisë mund të mbingarkohet, nëse njerëzit nuk shmangin ndërveprimet shoqërore.
