Klubi i Bundesligës gjermane, Augsburg, e ka tallur keq mesfushorin shqiptar të Arsenalit, Granit Xhaka, pas paraqitjes së tij të dobët në derbin e Londrës veriore kundër Tottenhamit.
Përfaqësuesi shqiptar i Zvicrës ishte ndër lojtarët më paraqitjen më të dobët në humbjen e Arsenalit 2:0 kundër Tottenhamit të dielën në Premierligë.
Një përdorues i rrjetit social Tëitter, e krahasoi nivelin e Xhakës me nivelin e klubit gjerman Augsburg.
“Niveli i Xhakës është Augsburgu”, shkroi ai.
Dhe klubi gjerman – i cili renditet në vendin e 10-të në Bundesligë – nuk u durua pa dhënë një përgjigje ekipe.
“Kini respekt për ne”, shkroi Augsburg.
Ky reagim i mori më shumë se 140 mijë pëlqime dhe shumë shpejt e bëri xhiron e botës në Tëitter.
Xhaka ishte cak i kritikave të ashpra edhe nga ekspertët e futbollit në Angli.
Ish-lojtari dhe ish-trajneri i Liverpoolit, Graeme Souness, e kritikoi Xhakën se dështoi ta mbulonte mungesën e Thomas Partey, i cili u lëndua, gjatë kundërsulmit nga i cili Tottenhami e shënoi golin e dytë.
“Lojtarët e mëdhenj, liderët, nuk lejojnë që një gjë e tillë të ndodhë në fushën e futbollit”, tha Souness, ekspert i Sky Sports.
“Mesfushor qendror, apo mesfushor mbrojtës – nuk e di se çfarë është Xhaka, janë bërë gjashtë apo shtatë vjet dhe nuk e kam të qartë se çfarë roli luan ai”, shtoi ai.
Xhaka mori kritika edhe nga legjenda e Manchester United, Gary Neville, për shkak të kartonit të panevojshëm që e mori një çerek para fundit të lojës kur ndërhy ashpër ndaj Son.
“Kjo është çmenduri. Gjëja e fundit që të duhet nëse je lojtar i Arsenalit në këtë çast është të ndalet loja”, tha Neville.
“Son nuk po shkonte askund. Nga ajo pozitë ai nuk mund të krijojë kundërsulm dhe ndërhyrja (e Xhakës) vetëm sa e vonoi lojën për 40 sekonda më shumë”, shtoi ai.
