Policia greke ka arritur ta shtjerë në dorë paraditen e sotme, të burgosurin shqiptar Albiano Xhezairi që u arratis nga burgu i Avlonës. Ai u kap në rrugën Menandru të Athinës. Në arrati ka mbetur shoku i tij sirian.
Xhezairi, që konsiderohet se bën pjesë aktive në atë që quhet Mafia e Koridhalos, bashkë me një sirian, u arratisën mbrëmjen e së hënës në orën 21:40. Kur njeri nga të burgosurit kapërceu i pari gardhin e burgut, u pa nga një polic jashtë rrethimit. Ai e kuptoi se çfarë po ndodhte, por të arratisurit, që u bënë dy, e qëlluan në fytyrë dhe u zhdukën në errësirë.
Disa muaj më parë, Xhezairi u përfshi në një sherr në në Spitalin Psikiatrik të Koridallos që rezultoi në humbjen e jetës së një personi. Në atë kohë disa thoshin se shqiptarët vepronin nën komandën e “trurit” të burgut. Pas konfrontimit, Xhezairi u dërgua në burgun e Avlonës, nga ku dhe u arratis.
Albiano Xhezairi është dënuar me 16 vjet burg në Greqi për trafik droge dhe si pjesë e një grupi kriminal. Ai transportonte drogë në kufirin Shqipëri-Greqi derisa u kap në maj të vitit 2017 në Athinë.
Por dosja penale e Xhezairit është e rëndë. Ai është person i kërkuar në Shqipëri për vrasjen e Aleksandër Bardhit në Shëndelli të Sarandës në vitin 2016.
