Rozeta Dobi, pastruesja e cila vodhi mijëra euro nga shtëpia e ish-këshilltares, Alda Klosi, ishte denoncuar edhe herë të tjera për vjedhje të banesave.
Gazetari Poli Hoxha tha për Euronews Albania, se këto denoncime u tërhoqën, kur policia zbuloi shumën prej rreth 405 mijë euro dhe 8500 dollarë, pas një kontrolli në banesën e saj.
“Denoncimet e tjera që janë tërhequr, janë tërhequr sa doli në lojë çështja e parasë. Po, janë tërhequr, kjo nuk ka rëndësi. Janë tërhequr sapo u gjetën paratë. Këta kanë funksionuar siç funksionon rëndom, në çdo ambient pune apo ambient miqësor.
Kjo pastruese kishte punuar 5 vjet dhe këta ia rekomandojnë njëri-tjetrit. Rrethi i saj dihet se kush ishte. E gjitha kjo, për mendimin tim, nuk duhet të përqëndrohet thjesht te grabitja dhe të mbyllet me këto para jetime të cilat i sekuestron shteti”, theksoi ai
Gazetari tha gjithashtu se zyrtarja Alda Klosi denoncoi në polici vjedhjen e bizhuterive dhe jo të parave.
“Unë kam konsultuar njoftimin e parë të policisë. Flitet edhe për denoncimin e zonjës Klosi. Ka edhe shumë raste në dijeninë time, në disa të publlikuara, në disa raste të pablikuara, të cilët denoncojnë vjedhje banesash, por nuk zënë në gojë para, sepse e dinë mirë që duke qenë në detyra shtetërore, duhet ta justufikojë atë para që është vjedhur. Te njoftimi i parë i policisë, thuhet që më 15 dhjetor shtetasja denoncon vjedhjen në banesën e saj dhe thotë që në një sirtar i janë vjedhur një sasi bizhuterish dhe që dyshon te pastruesja.
Policia shkon dhe kryen kontrolle te shtëpia e tyre, i gjejnë shumën e parë jo të plotë, sepse ishte shpenzuar edhe për makina e gjëra të tjera. Në momentin që njoftohet e prekura, merret në pyetje dhe i thonë që gjetëm një sasi bizhuterish, por edhe një sasi parash, atëherë kjo pranin shumën 120 mijë, duke menduar që këtë shumë edhe mund ta justifikojë. Ajo i ka fshehur paratë, në denoncim i ka fshehur paratë, nuk i ka zënë në gojë”, theksoi ai.