Asambleja e Përgjithshme e Aleancës së Agjencive të lajmeve në Ballkan dhe në Europën Juglindore zhvilloi pasditen e djeshme në Tiranë takimin ku Shqipëria mori presidencën e radhës nga agjencia turke e lajmeve Anadolu Agency (AA).
Ky ishte një prej vendimeve të marra nga Asambleja që zgjodhi drejtoreshën e përgjithshme të ATSH-së, Armela Krasniqi, Presidente e Aleancës së Agjencive të lajmeve në Ballkan dhe në Europën Juglindore për një mandat njëvjeçar.
Takimi i ardhshëm i Asamblesë së Përgjithshme u vendos të mbahet në Kosovë.
Në fokus të diskutimeve mes drejtuesve të agjencive të lajmeve të ABNA-SEE, ishte edhe dakordësia për të krijuar një platformë e-book ku të gjithë anëtarët e Aleancës së Agjencive Ballkanike të lajmeve do të kontribuojnë me artikuj që promovojnë turizmin, traditat e trashëgimisë kulturore e shpirtërore të vendeve të tyre, monumentet, destinacionet, kulinarin dhe gjithçka me vlerë për nxitjen e potencialeve turistike të vendeve.
Kjo platformë e dakordësuar midis agjencive anëtare do të shërbejë si udhërrëfyes për çdo turist që viziton rajonin.
Përmes platformës, turistët mund të kenë një busull të destinacioneve dhe atraksioneve që mund të vizitojnë në secilin vend ballkanik. Ata do të mësojnë më shumë se çfarë duhet të shohin dhe ku mund të shkojnë për të provuar ushqim tradicional apo për të përjetuar mënyrën e jetesës lokale në secilin nga vendet ballkanike.
Asambleja e Përgjithshme e Aleancës së Agjencive Ballkanike të lajmeve u mblodh pas përfundimit të konferencës në Tiranë të organizuar nga Agjencia Telegrafike Shqiptare me titull “Media&Tourism, Ideas&Solutions”, me pjesëmarrjen e drejtuesve më të lartë të këtyre agjencive. Synimi i kësaj konference ishte të krijojë kanale të reja të bashkëpunimit, për promovimin e turizmit në vendet e Ballkanit.
Aleanca e Agjencive Ballkanike të lajmeve, ku ATSH është anëtare me të drejta të plota, është themeluar në vitin 1995.
Anëtarët e saj janë AGERPRES (Rumani), ANA-MPA (Greqi), AA (Turqi), ATSH, BTA (Bullgari), CNA (Qipro), FENA (BH), HINA (Kroaci), SRNA (Republika Serbska) MIA (Maqedoni), KosovaPress (Kosovë) dhe TANJUG (Serbi) ndërsa vendet me statusin e vëzhguesit janë Moldavia, Sllovenia, Armenia dhe Mali i Zi. /j.p/1 nga 7
