Ministri i Jashtëm në detyrë, Gent Cakaj ka marrë vendimin për të bërë disa ndryshime në sektorin që mbulon. Fillimisht foli për më shumë se 20 shkarkime dhe transferime të diplomatëve që, sipas tij, “nuk përmbushin as kushtet ligjore, as kushtet minimale profesionale për kryerjen e kësaj detyre.”
Reagimet për këtë spastrim në një prej sektorëve më të rëndësishëm dhe më delikat të shtetit ishin të shumta, ndërkohë që Cakaj bëri sot një tërheqje duke theksuar se nuk bëhet fjalë saktësisht për 20 shkarkime.
“E para citimi i deklaratës sime nuk ishte saktë për faktin që kam vendosur të shkarkoj 20 punonjës. Unë kam thënë se me një pjesë të punonjësve është bërë shkëputja e marrëdhënies së punës dhe një pjesë do bëhet transferimi. Por nuk janë bërë 20 shkarkime nga puna”, u shpreh Cakaj në Komisionin e Integrimit.
Burime të politiko.al, bëjnë me dije se janë të paktën shtatë diplomatë që pritet të shkarkohen ose të transferohen në Tiranë nga kryeqendrat evropiane ku shërbejnë aktualisht.
Bëhet fjalë për:
-Xhuli Keko, e veja e shkrimtarit Teodor Keko – Diplomate në Ambasadën e Shqipërisë në Holandë.
-Majlinda Dodaj, motra e Aleksandër Frangajt, pronar i Tv Klan – Diplomate në Ambasadën e Shqipërisë në Vatikan.
-Pranvera Skana, ish-bashkëshortja e Henri Çilit, pronar i ‘UET’ – Diplomate në Ambasadën e Shqipërisë në Mbretërinë e Bashkuar.
-Gerarta Ballo, vajza e Artur Zhejit, gazetar dhe drejtues i emisionit ‘360 gradë’ – Diplomate në Ambasadën e Shqipërisë në Itali.
-Alket Çani, vëllai i Arjan Çanit, gazetar dhe drejtues i emisionit ‘Zonë e Lirë’ – Diplomat në Ambasadën e Shqipërisë në Francë.
-Inid Milo, vajza e Paskal Milos, ish-ministër i Jashtëm – Drejtuese e Drejtorisë së NATO-s pranë Ministrisë së Jashtme të Shqipërisë.
Besjan Zogaj, djali i Preç Zogajt, shkrimtar dhe analist – Diplomat pranë Ministrisë së Jashtme të Shqipërisë.
