Ditën e sotme, teksa prezantoi platformën “Deputeti që duam”, kryeministri Edi Rama u pyet sa i takon rregullit të ri antiCovid, atij të mbajtjes së maskës jo vetëm brenda ambienteve të mbyllura.
I pyetur nëse ekziston mundësia, që edhe me këto gjoba të ndodhë njësoj si dikur, ku gjatë periudhës së karantinimit u vendos falja e tyre, Rama u shpreh kështu:
“Së pari kjo jetë është zgjedhje dhe kur zgjedhim të respektojmë rregullat nuk e bëjmë se përndryshe mund të përfundojmë keq. Unë personalisht i zbatoj se kam dëshirë që t’i shkel por meqë mund të më kapë ligji i respektoj.
Në rastin konkret, për rregullat që lidhen me situatën konkrete vlen e njëjta gjë, kushdo që i zbaton mbron veten e tij, familjen e tij. Ata që respektojnë rregullat s’kanë nevojë t’i ngushëllojmë pse nuk morën gjobë që gjoba t’u falej. Nëse dikush zgjedh të jetojë me punën e tij, të zhvillojë karrierën e tij, të rrisë cilësinë e jetës së tij, bazuar në disa parime, kur dikush tjetër zgjedh që të pasurohet në kurriz të të tjerëve këto janë zgjedhje. Ka gjithmonë një kohë kur kush gabon paguan, por ka edhe raste kur kush gabon nuk paguan, por kjo s’do të thotë që ai që respekton rregullat duhet të ndihet keq.
Kjo është një betejë jashtëzakonisht e komplikuar, një luftë pavarësisht se disave nuk u pëlqen përdorim i këtij termi, është luftë e gjatë, nervash dhe për hir të vërtetës sjellja e shumicës së shqiptarëve ka qenë shumë pozitive, sot mbresëlënëse, mbajtja e maskave, është 99% me një sy të parë, ndërkohë që gjobat që janë vënë janë amnistuar në një moment të cakuar për të dhënë edhe një mesazh tjetër që këtu nuk është çështja e frikës, është çështja të kuptojmë mirë që duhet të gjithë të kontribuojmë, nga ana tjetër për hir të vërtetës në faljen që bëmë vlerësuam edhe një fakt tjetër, ata të cilët nuk kishin paguar ende apo ende kishin makina të bllokuara, prej shkeljes së rregullave meritonin një mirëkuptim pasi sidoqoftë një periudhë jo e shkurtër kaloi dhe përsa u përket gjobave tani sigurisht që s’është dëshira të vëmë gjoba, ju e dini që unë me gjobën kam një raport shumë strikt, asnjëherë se kuptoj që thonë se gjobat janë të larta, për mua duhet të jenë shumë më të larta, s’është taksë, është ndëshkim për diçka që ti ke në dorë të mos e bësh.
Në lidhje me gjobat në këtë situatë, duhet ta shohim pak më në mënyrë komplekse, besoj se dhe kjo që ndodh sot është rezultat i efektit që kanë bërë gjobat e vëna pavarësisht se pastaj ne kemi zgjedhur të jemi tolerantë më njerëzit, nuk shoh arsye pse kush ka zbatuar rregullin të ndihet keq, pse dikush tjetër nuk është ndëshkuar deri në fund. Pjesërisht janë ndëshkuar, kanë lënë makinat nëpër parkimet e policisë për muajt e muaj te tërë dhe kjo s\është pak, sot që e kam mbajtur maskën gjatë gjithë kohës s’jam ndjerë mirë derisa të mësohem, por duhet të mësohemi, duhet kuptuar edhe rëndesa psikologjike e njerëzve, është një marrëdhënie pak më fleksibël se zakonisht”.
Top Channel
