Një krim i tmerrshëm ka ndodhur të enjten në Basel të Zvicrës, ku një grua e moshuar 75-vjeçare ka vrarë me thikë një vogëlush 7-vjeçar nga Lipjani i Kosovës, afër shkollës së tij.
Djali humbi jetën dje rreth orës 13:00 në një rrugë të Baselit, ndërsa e moshuara tashmë është vetëdorëzuar në polici.
7-vjeçari me inicialet I.M nga komuna e Lipjanit po kthehej nga shkolla, kur u ther në mes të rrugës nga e moshuara, e cila e pranoi krimin para organeve të rendit. Djali jetonte prej vitesh në Basel me familjen e tij, ndërsa mbeten ende të mistershme shkaqet e këtij krimi makabër.
Prokurorët nuk kanë konfirmuar nëse ka pasur një lidhje midis viktimës dhe gruas së moshuar, e cila pas krimit u pa të largohej me vrap. Rasti në fjalë ka tronditur banorët e asaj zone, të cilët kanë frikë të dalin në rrugë.
Nxënësi i shkollës fillore u gjet në rrugë nga një mësues që kaloi me biçikletë. Dëshmitarë të tjerë okularë thanë se fëmija e kishte fytin e prerë dhe pranë tij kishte shumë gjak.
Një nënë thotë se edhe fëmijët e saj ndihen të frikësuar se mos e njëjta gjë do të ndodhë edhe me ta. Ndërsa të tjerë prindër ditën e sotme i kanë shoqëruar fëmijët e tyre për në shkollë, edhe pse zakonisht ata shkonin vetëm.
“Mund të na kishte ndodhur secilit prej nesh”, tha një tjetër.
Tre djem të shkollës ku 7-vjeçari kishte vijuar mësimin, kanë thënë se e morën lajmin nga prindërit e tyre.
“Kur na njoftuam ne ishim duke luajtur basketboll, nuk mund ta besonim se çfarë kishte ndodhur”, thanë ata.
Para këtij akti, disa banorë rrëfyen se kishin dëgjuar britma të një fëmije, por nuk e kishin menduar se ishte në rrezik.
“Shpesh këtu fëmijët dëgjohen duke luajtur dhe bërtasin, pasi këtu është shkolla. Nuk e menduam se ishte ndonjë rrezik”, thotë një banore.
