Dy familje nga Tepelena janë infektuar me koronavirus pasi morën pjesë në një dasmë në kryeqytet. Ditën e sotme Ministria e Shëndetësisë dhe Mbrojtjes Sociale njoftoi se në qytetin e Tepelenës janë regjistruar 7 raste me koronavirus.
Ndërkohë që mësohet se 7 rastet me COVID-19 janë anëtarët e dy familjeve, të cilët vetëm disa ditë më parë kishin marrë pjesë në një ceremoni martesore në Tiranë, ku ata ishin të ftuar.
Të dyja familjet jetojnë në fshatin Dukaj dhe ministria ka marrë sot edhe tamponët e personave me të cilët ata kanë pasur kontakte. Kujtojmë se prej kohësh në njoftimet zyrtare të bëra nga Ministria e Shëndetësisë dhe Mbrojtjes Sociale është bërë thirrje për të shmangur grumbullimet apo marrjet pjesë në ceremonitë martesore apo mortore.
Ndërkohë ditën e sotme në vendin tonë janë shënuar rekorde rastesh vetëm në 24 orë, ku u njoftua se janë infektuar 119 persona.
“Gjatë 24 orëve të fundit janë kryer 482 testime për të dyshuar të prekur me COVID19, nga të cilat janë konfirmuar 119 raste pozitive. Shpërndarja gjeografike e rasteve është si vijon: 69 raste në Tiranë, 8 në Kavajë, nga 7 raste në Krujë, Tepelenë, 5 në Lezhë, 4 në Durrës, nga 3 raste në Elbasan, Pogradec, nga 2 raste në Shkodër, Fier, Korçë, Has, Lushnje, dhe nga 1 rast në Mallakastër, Kamëz, Malësi e Madhe,”-njoftoi sot ministria.
