Themeluesi i “Majkrosoft”, miliarderi Bill Gejts dhe bashkëshortja e tij Melinda do të dhurojnë 10 milion dollarë amerikan për masa kundër përhapjes së koronavirusit në Kinë dhe Afrikë, citohet në kumtesën e publikuar në ueb faqen e fondacionit, njofton MIA.
“Fondacioni Bill dhe Melinda Gejts sot publikoi se do të ndajë 10 milion dollarë amerikan për ndihmë dhe mbështetje teknike adekuate për t’u ndihmuar atyre të cilët luftojnë me përhapjen e virusit në Kinë dhe Afrikë. Kjo do t’i përforcojë përpjekjet për parandalim të përhapjes globale të koronavirusit”, citohet në kumtesë.
Mjetet do të ndahen njëjtë midis Kinës dhe qendrave për kontroll dhe parandalim të sëmundjeve në Afrikë.
Të paktën 80 persona vdiqën nga koronavirusi, ndërsa vetëm në Kinë janë infektuar 2.744 persona.
Virusi nga Kina vazhdoi të përhapet në botë, ku janë regjistruar 50 raste të të infektuarve, prej të cilëve pesë në SHBA.
Tani për tani nuk ka raste të vdekjes jashtë Kinës, ndërsa të infektuar janë regjistruar në Hong-Kong, Makao, Tajvan, Tajlandë, Japoni, Koreja Jugore, SHBA-ja, Kanadaja, Vietnami, Singapori, Nepali, Australia, Malejzia dhe Franca.
Rreth 60 milion njerëz janë në karantinë të pjesshme ose të tërësishme, sepse autoritetet kineze ndaluan hyrjen dhe daljen nga qyteti Vuhan, ku u paraqit virusi.
