Kreu i grupit parlamentar të PS-së Taulant Balla ka paralajmëruar kreun e PD-së Lulzim Basha se nëse nxit dhunë, kryen akte vandalizmi apo sulmon policinë do përballet me ligjin. Duke folur sërish në parlament për protestën e sotme të opozitës që do bllokojë disa akse të rëndësishme kombëtare, Balla rrëfeu edhe çfarë i kishte thënë përfaqësuesi i një kompanie gjermane.
“Basha dhe Kryemadhi kanë vendosur të bllokojnë sot të gjitha akset kryesore kombëtare por nuk mund të bllokojnë dot reformën në drejtësi. Nuk mund të bllokojnë miratimin e këtij ligji, sikur nuk kanë mundur që prej 2016 të bllokojnë paketën. Ata munguan në pjesën më të madhe të këtij procesi.
Në vazhdën e këtyre protestave të dhunshme që dëmtojnë ekonominë… Ishim para pak minutash në Rinas ku u hodh themeli për një nga hotelet më 5 yje më të mira në Shqipëri. Përfaqësuesi i kësaj kompanie gjermane tha se erdha nga Mynihu me një avion të madh të mbushur plot me turistë gjermanë. Dhe ndërsa shkojnë në Vlorë, do iu dalë para Luli dhe Mona. Do pyesin ça halli kanë, halli i tyre është reforma në drejtësi. Nuk kanë për t’ia arritur të bllokojnë demokracinë dhe as zgjedhjet. Halli i tyre është halli i biznesit të kunatit jo i një qytetari të ndershëm.
Dëgjoje Lulzim: Ke të gjithë të drejtën të protestosh ku të duash sa të duash po harroje se mund të nxisësh dhunë, të kryesh akte vandalizmi, të sulmosh policinë se ke për t’u përballur me ligjin qoftë ti apo kushdo tjetër”, deklaroi Balla.
