Covid i merr jetën një tjetër personaliteti të artit në Shqipëri.
Bëhet fjalë për kornistin Andrea Canaj. Ai u nda nga jeta në moshën 59-vjeçare, duke mos i bërë dot ballë virusit të rrezikshëm.
Lajmi bëhet i ditur nga Teatri Kombëtar i Operas, Baletit dhe Ansamblit Popullor.
“Shquhet për optimizmin e tij dhe kujtohet me dashuri nga miqtë e tij muzikantë të cilëve u është gjendur gjithmonë pranë. Do të mbetet artisti i palodhur me punën e tij me studentët dhe pjesëmarrjen në aktivitetet artistike”, – shkruan ndër të tjera Teatri.
Njoftimi i plotë:
Teatri Kombëtar i Operas, Baletit dhe Ansamblit Popullor, me hidhërim të thellë mësoi ndarjen nga jeta të kornistit Andrea Canaj.
Andrea Canaj u nda sot nga jeta në moshën 59-vjeçare pas një lufte me Covid, të cilën nuk e fitoi dot.
Kornisti Canaj e nisi karrierën e tij artistike në vitin 1988 si kornist pranë Orkestrës së Teatrit të Operas dhe Baletit dhe nga viti 1990 deri në vitin 2000 ka qenë kornist i parë i Orkestrës. Më pas, ka punuar si kornist i parë dhe në Orkestrën Simfonike RTSH dhe njëkohësisht ka qenë pedagog pranë Universitetit të Arteve.
Shquhet për optimizmin e tij dhe kujtohet me dashuri nga miqtë e tij muzikantë të cilëve u është gjendur gjithmonë pranë. Do të mbetet artisti i palodhur me punën e tij me studentët dhe pjesëmarrjen në aktivitetet artistike.
Teatri Kombëtar i Operës, Baletit dhe Ansamblit Popullor i shpreh ngushëllimet familjarëve, të afërmve, miqve, bashkëpunëtorëve dhe admiruesve që e duartrokitën gjatë gjithë karrierës së tij.
I paharruar kujtimi i tij!
