Autoriteti Kombëtar i Ushqimit vijon kontrollet në të gjitha subjektet që ofrojnë shërbimin e tregtimit të produkteve ushqimore me qëllim garantimin e sigurisë ushqimore dhe mbrojtjen e shëndetit të konsumatorëve.
Drejtoria rajonale e AKU Elbasan kreu 26 kontrolle tek operatorët e biznesit ushqimor me origjinë shtazore, joshtazore dhe produktet e mbrojtjes së bimëve. Sipas AKU-së, janë marrë 6 mostra për kryerjen e analizave laboratorike.
Pas kontrolleve të ushtruara AKU bllokoi 1267 litra pije alkoolike (raki, verë dhe konjak) në tre subjekte, për të cilat janë marrë mostra për kryerjen e analizave laboratorike. Këto produkte do të qëndrojnë të bllokuara deri në daljen përfundimtare të përgjigjeve të analizave.
Po ashtu, AKU vendosi 2 masa administrative duke kërkuar korrigjim të mangësive të konstatuara gjatë kontrolleve të kryera.
Masat administrative i referohen shkeljeve ligjore që lidhen me mungesën e analizave të ujit, librezave shëndetësore të punonjësve, etj.
Autoriteti Kombëtar i Ushqimit do të vijojë pandërprerë kontrollet rigoroze në të gjithë vendin me qëllim mbrojtjen e shëndetit të konsumatorëve dhe mbajtjen pastër të tregut nga produkte të papërshtatshme për konsum human.
