Instituti i Gjeoshkencave, Energjisë, Ujit dhe Mjedisit ka deklaruar për të gjithë shtetasit e Republikës së Shqipërisë që pasditen e kësaj të enjte (07 Janar) dhe nesër (08 Janar) të ketë reshje shumë intensive në qarqet Shkodër, Kukës, Dibër, Lezhë, Vlorë dhe Gjirokastër.
Në qarqet Durrës, Tiranë dhe Elbasan priten reshje intensive, ndërsa në qarqet Fier, Berat dhe Korçë mesatare deri lokalisht intensive. Sipas njoftimit reshjet do të shoqërohen me shtrëngata. Ndërsa në veri dhe lindje në lartësitë mbi 600 metra reshjet do të jenë në formë bore.
IGJEUM paralajmëron gjithashtu se përgjatë datave 7-11 Janar 2021 do të reshje shumë intensive, pothuajse në të gjithë territorin. Nga llogaritjet hidrologjike, këto reshje do të sjellin rritje të rrezikshme të prurjeve në lumenjtë e mëdhenj dhe të mesëm Drin-Buna, Mat, Ishëm, Erzen, Shkumbin, Seman dhe Vjosë.
Shkalla e rrezikut nga përmbytjet lumore do varet edhe nga sasia e shkrirjes së dëborës si pasojë e rritjes së temperaturave. Përmbytje urbane dhe rrëshqitje të dherave mund të ndodhin gjithashtu në pothuajse të gjitha qarqet.
Kujtojmë se edhe ditën e djeshme Instituti i Gjeoshkencave, Energjisë, Ujit dhe Mjedisit ka paralajmëruar për reshje shiu me intensitet të lartë teksa ka njoftuar gjithashtu edhe për përmbytje dhe rrëshkitje dherash.
